Нұр-Мүбарак Египет ислам мәдениеті университетінде «Ислам ілімдері» бойынша студенттік олимпиада өтті. Іс-шараның ашылу салтанатына оқу ошағының ректоры Ахмед Хусейн Мұхаммед Ибраһим мен проректор, PhD доктор Ершат Ағыбайұлы Оңғар арнайы қатысты.

Білім бәсекесінде университет ректоры құттықтау сөз сөйлеп, Ислам ілімдерін игерудің артықшылығын алға тартты: «Біз үшін Ислам ілімдерін терең меңгерген, парасатты, отансүйгіш жас буын тәрбиелеу – басты мақсаттардың бірі. Себебі, ілім мен иман қатар жүрген жерде ғана қоғамда әділет, бірлік және рухани тұрақтылық орнайды».

Елеулі жиында оқу ордасының проректоры, PhD доктор Ершат Ағыбайұлы Оңғар да сөз өрбітіп,
«Исламтану ілімін» зерттеуге бет бұрған жастарға сенім білдірді: «Исламтану ілімін» қазіргі заманға сай бағытта талдап-талқылау орынды қарекет. Біз «Исламтану ілімін» зерделеуге ниетті әр шәкірттің қанатын қомдауға, оларға осы жолда оңтайлы жағдай жасауға мүдделіміз. Бүгінгі студенттік конференция «Исламтану ілімін» заманауи бағытта зерттеуге, тың деректер мен құнды қайнаркөздерді парықтауға, аталмыш ғылымды жетілдіруге дәнекер болады деген сенімдемін».