2025 жылдың 9 желтоқсанында Нұр-Мүбарак Египет ислам мәдениеті университетінің Ғылым бөлімі «Ғылыми мақалаларды жариялаудың кәсіби нормалары: зерттеу әдістері мен редакциялық талаптар» тақырыбында ауқымды ғылыми-әдістемелік семинар ұйымдастырды. Іс-шара университеттің Тәуелсіздік залында өтіп, ғылым саласында еңбек ететін жас зерттеушілер мен оқытушылар үшін маңызды кәсіби диалог алаңына айналды.

Семинардың негізгі мақсаты – ғылыми жұмысты сапалы дайындау және халықаралық өлшемдерге сай жариялау мәдениетін нығайту, сондай-ақ жас ғалымдардың зерттеу дағдыларын жетілдіру болды. Жиын барысында қатысушылар ғылыми мақаланың құрылымдық талаптары, қазіргі ғылыми әдіснама принциптері, деректерді жинау, талдау және салыстырмалы сараптаудың тиімді тәсілдері жөнінде егжей-тегжейлі мәлімет алды. Сонымен қатар халықаралық журналдарда жарияланатын материалдарға қойылатын талаптар, редакциялық сараптамадан өту тәртібі, мақаланың этикалық және академиялық адалдық тұрғысынан тексерілуі сияқты маңызды бағыттар жан-жақты талқыланды.